شرعية...!!!!
على جثة حلمى المسروق
واخد بعضه و طالع فوق
و انت سؤالك دايما رده
الشرعية من الصندوق

صندوقك بيجيب شرعية
و بيجيب كرسى و سلطة
و منصب
و صندوقنا احنا فمالهوش
ديا
مليان شهدا بطول الموكب
اقعد دلدل رجلك و اركب
حس بنشوة زهو السلطة
ادمنت الفوز طعم المكسب
و احنا نأدن تانى ف مالطة

و احنا نهاتى و مين يسمعنا
جيل مات نصه و الباقى ملوا
و انت سيادتك بترجعنا
لفكرة خليهم يتسلوا
فكرة خليهم يتخلوا
عن احلامهم او ينسوها
جيل شاف موته و ماشى ف
ضله
و عمل الثورة اللى سرقتوها
عمره ف يوم ما هيرضى بذله
و لا هيبيع زى ما بعتوها

و اه منها الشرعية يا سيدنا
اللى تخليك بتهددنا
هو انك اصبحت رئيسنا
ده بيديك الحق تبيدنا
دى الشرعية بطعم الموت
و ريحة الدم ف كل مكان
جايز ممكن تشترى صوت
و قولى ازاى تشترى انسان..؟!

و انت قتلت الجندى بكام..؟؟
ف جابر جيكا هتدفع كام..؟؟
و كريستى و حسينى ابو ضيف
شهداء صندوق الاوهام
صندوق الصفقة المطبوخة
و رئيسنا المدنى الطرطور
صندوق النهضة المفضوحة
و سيادته مسميها عبور
صندوق الناس المفشوخة
خدنا سيادتك احلى خابور

و ترجع تانى تقول شرعية
و احنا ننادى على الحرية
وخدين صندوقنا و ماشيين
ندفن شهداءنا و راجعين
و نحلف وحياة دم ولادك
لنرجع خمسة و عشرين
لنرجع خمسة و عشرين......!
المصدر: محمد حمدي

المقالات الأحدث